Home Actual Davart nus Descripziun da las malsognas Formalitads per in’ospitalisaziun Terapia Lieu da la clinica Colliaziuns Impressum Contact



Unbenanntes Dokument

Tinnitus


Il pled “tinnitus” vegn da l’expressiun latina “tinnire”, quai che signifitgescha scalinar. Tinnitus vegnan numnadas tut las ramurs en las ureglias ed en il chau. Questas ramurs vegnan descrittas a moda fitg differenta, per exempel sco in gnugnar, tschivlar, siblar u schuschurar. Las ramurs pon esser da frequenza bassa, mesauna u auta, ubain ina maschaida da differentas frequenzas. Uschia ha per exempel il cumponist tschec Bedrich Smetana descrit ses tinnitus sco in accord sept en as-dur.

In tinnitus è ina percepziun acustica senza ch’i dat ina funtauna da tun externa. Ins differenziescha tranter in tinnitus objectiv, chaschunà da tuns a l’intern dal corp, sco per exempel il sang che cula sin fundament d’ina anomalia da las avainas, ed in tinnitus subjectiv, perceptibel mo per il pertutgà, perquai ch’i na dat nagina funtauna da tun interna. In tinnitus vegn classifitgà tenor sia durada: acut (enfin 3 mais), subacut (> 3 enfin 12 mais) e cronic (> 12 mais).
Il grad da grevezza vegn determinà il meglier a maun dal questiunari da tinnitus tenor Göbel e Hiller. I dat la suandanta classificaziun: lev (0-30 puncts), mesaun (31-46 puncts), grev (47-59 puncts) e fitg grev (60-84 puncts). A partir d’in tinnitus mesaun vegni recumandà da far ina psicoterapia. En cas d’in tinnitus grev u fitg grev èsi inditgà da far ina terapia staziunara en ina clinica da tinnitus.
L’intensitad d’in tinnitus è per il solit tranter 5 e 15 decibel sur il cunfin d’udida da la persuna pertutgada. Tscherts facturs pon però augmentar la percepziun subjectiva dal tinnitus. Tranter auter èn quai stress, stancladad, canera, mal il dies e problems da la massella.
Mintga tinnitus che na svanescha betg a curta vista da sez sto vegnir controllà minuziusamain d’in medi. En la plipart dals cas è l’ureglia interna blessada. In tinnitus po esser la consequenza d’ina canera intensiva da curta u lunga durada, d’ina sperdita andetga da l’udida, d’in virus u da la malsogna Morbus Ménière. Savens chaschuna stress in tinnitus. In tinnitus è però darar in sintom per in disturbi organic da l’apparat d’udida central en il tscharvè. Problems dals spinals dal culiez u da la massella, malsognas internas sco ipertonia, diabetes mellitus u disturbis dal metabolissem da grass pon provocar la malsogna u la rinforzar. Igl è inditgà da far tut las controllas necessarias per pudair excluder era raschuns gravantas ch’èn plitost raras. Per ils pertutgads èsi impurtant da savair ch’il tinnitus n’è betg in indizi per ina malsogna privlusa.
In tinnitus acut po svanir da sez. Il tractament immediat cun cortison e medicaments che promovan ina buna circulaziun dal sang, ina terapia che vegn per ordinari era fatga en cas d’ina sperdita andetga da l’udida, duai augmentar las schanzas da guariziun per var 20%.
Enfin uss n’èsi anc betg pussaivel da guarir durablamain in tinnitus cronic, ni cun medicaments ni cun metodas alternativas, sco p.ex. l’acupunctura. Cun agid da la terapia da retrenar in tinnitus, la psicoterapia e la terapia d’udida vegnan las painas dal tinnitus sminuidas, savens schizunt eliminadas, ed ils pertutgads chattan nov plaschair da viver.

Litteratura recumandada:
Gerhard Göbel: Tinnitus und Hyperakusis. Hogrefe (2003)
Bernhard Kellerhals, Regula Zogg: Tinnitus-Hilfe. Karger (2004)
Helmut Schaaf, Hedwig Holtmann: Psychotherapie bei Tinnitus. Schattauer (2002)

     
     
     
Lia :
Tudestg | Rumantsch
Talian | Franzos